RAILAKU, IDÚ (21/09/2022)-Ekipa Identidade Úniku (IDÚ) husi Ajénsia Teknolojia Informasaun no Komunikasaun (TIC Timor I.P-sigla Portugéz) konklui ona atividade sosializasaun programa Identidade Úniku iha Munisípiu Ermera, kuarta (21/09/2022).

Atividade sosializasaun ne’e hala’o iha Munisípiu Ermera liliu iha Postu Administrativu lima hanesan Ermera Vila, Atsabe, Letefoho, Hatolia no Railako hodi fahe informasaun ba autoridade Postu sira, Xefe Suku, Xefe Aldeia, no funsionáriu Ministériu sira ne’ebé destaka iha Munisípiu Ermera.

Sosializasaun ne’e rasik hahú husi Postu Aministrativu Ermera Vila, iha loron 15 fulan-Setembru 2022, ho objetivu atu fahe informasaun ba autoridade lokál sira hodi bele hatene kona-ba lala’ok IDÚ, no benifísiu sira ba komunidade sira, bainhira implementa programa refere.

Iha nia intervensaun Diretór Servisu Kooperativu, Sr. Juvenal do Carmo Lay reintera fali objetivu sosializasaun ne’e hodi hatete katak, “Sosializasaun ne’e pasu importante ba prosesu implementasaun Programa IDÚ atu bele minimiza dadus duplikadu ne’ebé akontese iha baze”, dehan Diretór Juvenal iha salaun Administrasaun Munisípiu Ermera, Glenu, kinta (15/09/2022).

Reprezentante Prezidente Autoridade Munisipál Ermera, Diretór Planu Dezenvolvimentu Investimentu Munisipál (PDIM) Sr. Antonio A. da Costa hatete, sosializasaun Identidade Úniku importante atu fahe informasaun kona-ba programa Governu nian ba lider komunitáriu sira iha baze.

Entretantu Xefe Suku Poetete, Felisberto das Neves, sente kontente no agradese ba ekipa ne’ebé fahe informasaun no husu atu aselera lalais programa ne’ebé Governu rasik trasa ona hodi fasilita autoridade lokál sira reduz dadus duplikadu sira.

Ba sosializasaun daruak nian hala’o iha Postu Administrativu Atsabe, iha loron 16 setembru 2022, hodi fahe informasaun kona-ba implementasaun programa ID Úniku, tanba IDÚ ne’e identidade dijitál, hodi identifika no auténtika ema, maibé ID Úniku sei la troka Billete Bdentidade (BI), kartaun eleitorál, sertidaun RDTL, karta kondusaun, no kartaun funsionamentu sira seluk, tanba ne’e ID Úniku rasik fasil no seguru atu deskobre sidadaun ne’ebé moris iha Timor-Leste.

Administradór Postu Atsabe, Sr. Constancio da Silva hatete, IDÚ ne’e pertinente ba
Xefe Aldeia no Xefe Suku sira atu deskobre ninia komunidade. Tanba ne’e husu atu aselera prosesu ne’e hodi bele fasilita dadus sira iha baze. “Ita husu atu bele aselera lalais no fasilita autoridade lokál sira bainhira komunidade sira hetan difikuldade ruma”.

Iha atividade loron datoluk nian hala’o iha Postu Administrativu Letefoho, loron 19 Setembru 2022, ho Administradór Postu Letefoho, Sr. António Manuel Soares ne’ebe hatete, Governu haree katak iha failansu sira ne’ebé durante ne’e akontese, tan ida-ne’e mak Governu hamosu programa ida-ne’e atu bele verifika lolos dadus komunidade sira-nian. Nomos programa IDÚ ne’e mai la’ós atu troka Kartaun Eleitorál, Billete Identidade no kartaun funsionál sira seluk.

Ba atividade sosializasaun ne’ebé hala’o iha Postu Administrativu Hatolia, loron 20 Setembru 2022, Reprezentante Administradór Postu Hatolia, Sra. Adriana de Jesus husu ba autoridade lokál sira liliu Xefe Suku no Xefe Aldeia sira atu hatutan informasaun kona-ba implementasaun Programa Identidade Úniku ba komunidade sira.

Sosializasaun ne’e rasik finaliza iha Postu Administrativu Railako, loron 21 fulan-Setembru 2022, ne’ebé loke direta husi Administradór Railaku, Sr. Tomas da Costa Soares iha salaun reuniaun Postu Railaku.

Administradór Railaku, Sr. Tomas da Costa Soares hatete, nia parte haree sosializasaun ne’e di’ak, maibé tempu badak liu, tanba ne’e espera sosializasaun la’ós para de’it iha-ne’e no kontinua nafatin ho tempu ne’ebé sufisiénte atu nune’e autoridade lokál sira bele komprende no entende programa IDÚ ho di’ak.

“Em prinsipiu sosializasaun ne’e di’ak, tanba komunidade sira bele hatene Identidade Úniku ne’e atu identifika pesoál ida-idak. Ha’u agradese mesmu oras ida ka rua bele fahe ona informasaun mai ami, maibé husu atu kontinua nafatin ba futuru no fó benefisiu ba komunidade sira,” afirma Administradór Railako.

Antes ne’e Diresaun IDÚ mós halo ona sosializasaun ba parseiru dezenvolvimentu sira, Ministériu sira, Universitáriu sira, no entidade relevante sira seluk, nomós sosializasaun dahuluk ba munisípiu ne’ebé hala’o ona iha Postu Administrativu sira iha Munisípiu Likisá, Postu sira iha Autoridade Munisipál Ermera, no Rejiaun Autonomia Espesiál Oekussi Ambeno (RAEOA) no sei kontinua ba Munisípiu sira seluk.

(MÍDIA_IDÚ)