LIKISÁ, IDÚ (12/09/2022)–Administradór Munisípiu Likisá, Sr. Pedro Paul Gomes hatete, nia parte sente kontente no agradese TIC Timor I.P. liuhusi Diresaun ID Úniku (IDÚ) ne’ebé halo sosializasaun ba inisíativa programa  ID Úniku ba Autoridade Postu Administrativu no lideransa komunitáriu sira iha Munisípiu Likisá.

Sosializasaun ne’ebé hala’o iha salaun Postu Administrasaun Likisá, segunda (12/09/2022) abertura husi Administradór Munisípiu Likisá, Pedro Paul Gomes, iha ninia intervensaun agradese no kontente ho ekipa ne’ebé halo sosializasaun ba programa implementasaun IDÚ, tanba bele fó informasaun ba autoridade lokál sira atu hatutan ba komunidade sira.

Administradór mós husu ba autoridade lokál sira husi Postu Administrativu to’o Xefe Suku sira atubele akompaña didi’ak hodi simu materia no hatutan ba komunidade sira kona-ba benefisiu husi IDÚ rasik atu kontinua hatuta ba komunidade no família.

Ho sosializasaun ne’ebé halo atu fasilíta informasaun ba komunidade sira iha Postu Administrativu Likisá Vila bazeia ba demografia suku hamutuk hitu hanesan suku Akumanu, Darulete, Dato, Hatokesi Leotela, Loidahar no Lukulai ho populasaun totál hamutuk 44.351, feto 14.723 no mane 14.905.

Iha sosializasaun ida-ne’e, hetan partisipasaun másimu husi Administradór Postu Likisá Vila, Alberto Rosa Gome, no ajente Administrasaun Postu Administrativu Likisá Vila, no Lideransa Komunitáriu sira no funsionáriu destakadu sira.

(MÍDIA_IDÚ)